立法會財務委員會上禮拜六通過高鐵撥款嗰一刻，場外結集嘅反高鐵人士情緒激動，仲圍堵立法會，逼運輸及房屋局局長Eva鄭汝樺同佢哋對話，結果Eva同一眾建制派立法會議員被困立法會六粒鐘後，終喺警方厚厚嘅「人肉屏風」護送下入咗中環港鐵站，一行人搭一個站「逃亡」到金鐘。
其中一個落難議員李慧琼憶述，當時情況太過混亂，而且大部分議員通常以私人座駕代步，所以好多人都冇散紙或者八達通喺身，港鐵惟有開閘放行，佢笑言：「我哋都冇畀錢，搭咗霸王車。」由中環搭去金鐘嘅車資係四蚊，十九個議員連局長同幾十個警察，呢次逃亡行動可能欠港鐵成幾百蚊喎。
Eva身邊嘅人透露，局長平時都係八達通不離身，由此推斷，Eva有可能冇搭霸王車，而警方發言人就話已經即日幫參與行動嘅警員繳付咗車資，換言之，依家得番班議員仲未「找數」。不過，富貴黨副主席張宇人自言佢直接搭去九龍塘轉的士返屋企，出閘時仲好誠實咁補足車資，唔知其他議員會唔會都畀番錢港鐵呢個救命恩人呢？