立法會啱啱開完兩日十五個鐘頭會傾高鐵撥款，一眾建制派議員之後仲被困立法會六粒鐘走唔到，身心俱疲，真係要抖多幾日先補得番。唔知係咪因為咁，由七個建制派議員組成嘅調查甘威專責委員會尋日差啲開唔成會。

只解決到部分程序問題

尋日到咗開會時間，喺會議室內就只有主席、經濟動力嘅「蘇菲」梁劉柔芬、副主席五散人一號陳健波同建仔劉江華三個到場，但仍然未湊齊主席加四名成員嘅法定人數，搞到負責點名嘅秘書處職員都有啲騰雞，擔心專責委員出師未捷先流會，好唔老利。

好彩喺呢個時候立法會保安收到通知，見到五散人二號林大輝同富貴黨方剛嘅座駕駛入立法會，會議只係遲開咗五分鐘左右，個個當堂安樂晒！

之後其他有會務在身嘅委員會成員都陸續返嚟開會，但進度就唔多理想，兩個鐘會議只係解決咗部分程序問題，而會否引用立法會權力及特權條例傳召女事主到立法會作供等關鍵問題就仲未傾到，相信仲要開多一兩次會先可以跟進到。

其實調查甘威嘅專責委員會一直波折重重，雖然一開始多數議員通過要做獨立調查，但泛民忽然話杯葛加入調查委員會，令到委員會差啲「難產」出唔到世，最後要屈陳健波、方剛同潘佩璆入會，先至湊夠人數可以查甘威。

委員會一開波就出現遲到早退嘅情況之餘，兩粒鐘嘅會議亦成果欠奉，睇嚟如果佢哋想早啲了結呢件事，日後真係入滿油開行Turbo先得嘞！