「雄仔都未交，我咪學佢囉。」

「咁強仔一早交咗，你又唔學吓人哋？功課拖得就拖，唔怪得考試肥佬啦。」

呢段老師同小朋友嘅對話，係咪有啲似曾相識呢？

嗱，港府本應喺舊年年底完成氣候變化顧問研究報告，結果依家再要押後最少五個月至搞得掂，話係因為顧問公司要配合內地公布嘅最新減排目標，需要額外研究緩減方案同進一步諮詢之後至公布喎。

叮！拖字訣呢招港府用慣用熟，延遲交報告都預咗啦。至弊初步緩減方案入面大部分都係舊建議，例如增加天然氣發電、推動電動車同採用生化柴油咁，以前早就傾過，當局呢次只不過係翻叮啫。

功課遲交不特止，仲做到求求其其亂咁嚟。據講，港府傾向跟隨內地嘅減排目標，換句話講，即係向低標準睇齊，愈容易過骨愈啱。叮！如果咁都得，不如索性乜都唔做罷啦。

正如環保組織人士話齋，本港相對來講發展比內地完善，照道理應該按更嚴格嘅標準，制訂更高嘅減排目標。攞個咁嘅低標準出嚟獻世，請問環境局局長邱騰華，港府到底係想減少碳排放，定係想趕潮流，湊吓熱鬧做場環保騷咋？

根據聯合國嘅數據，香港由一九九○年到二○○四年間，碳強度增長嘅減幅只有一成七，而同區嘅新加坡，減幅超過香港一半有多。港府環保成績比人哋差咗一大截，仲唔做多啲工夫急起直追，反而學人玩小聰明，用低標準嚟敷衍市民。慳啲啦！

更加離譜嘅係，發電廠係本港最大嘅二氧化碳排放來源，其次至係陸路交通。港府除咗一啲細眉細眼嘅措施之外，並冇好似環保組織同市民要求咁，為發電廠排放訂定目標，只係打算制訂汽車能源效益標籤，完全係避重就輕。咁搞法，想唔畀人鬧氣候逃犯都唔得啦。

叮！港府幾時有攞個心出嚟搞環保呀？連佢哋自己都帶頭唔環保啦。嗱，新廉政公署大廈就曾經畀審計署踢爆，話就話係環保設計，查實電力開支比估計數字超出一倍有多。機電工程署總部仲搞笑，懶咁巴閉話利用太陽能等再生能源，點知落成後耗電量唔單止冇減到，反而仲比以前多咗，簡直係笑爆嘴嘅「綠色幽默」。

算罷啦，港府根本係有心做騷冇心環保，旨意呢班氣候逃犯爭個藍天返嚟，咪盞嘥氣。減排報告過多幾個月都唔知搞唔搞得掂，如果到時交唔到功課，邱騰華係咪應該受少少懲戒先？打手板？體罰梗係唔得啦。不如簡單啲，就罰抄聯合國氣候大會嘅唯一成果《哥本哈根協議》，一百次咁多啦。叮！