前日高鐵撥款表決，一直力撐政府、支持高鐵撥款嘅議員梁美芬好弔詭咁喺表決時突然離開議事廳，冇投到票。佢尋日本來應承會出席一個政改論壇，竟然一樣玩失蹤。
論壇一開始，主持就讀出一封由梁美芬親自寫嘅信，話自己嘅助理唔小心，冇通知佢尋日有另外一個活動需要佢主持，所以唔能夠出席論壇咁話。全場一聽到梁美芬縮沙唔嚟，即刻爆出此起彼落嘅噓聲，同場有份演講嘅中大政治及行政學系副教授馬嶽仲話覺得好失望同好空虛，事關佢準備咗好多問題要「請教」梁美芬喎。
同場嘅社民連黃毓民就爆響口，話前日喺立法會，梁美芬煞有介事咁走過去問佢係咪搵咗百幾人喺呢個論壇度「圍」佢。毓民仲笑言，呢個論壇喺教會度搞，照計耶穌正常都會保吓佢嘅。總之你一言我一語，大家講得不知幾高興。