人稱「好打得」嘅發展局局長林鄭月娥尋日出席樓宇安全嘉年華時，棄套裝而換上一身黑色唐裝，驟眼睇一副「戰鬥格」咁，不過呢期反政府嘅重點戰線喺反高鐵撥款，林鄭唔使好似運輸及房屋局局長鄭汝樺咁要開馬拉松會議，更加唔使怕因為避見反高鐵人士而搞到被困立法會幾粒鐘兼要入港鐵站逃亡，只係要教老人家玩吓攤位遊戲，簡直係Easy Job啦！
話說林鄭主持完嘉年華開幕禮後，循例參觀吓啲攤位，大部分都係聽吓匯報，但去到介紹「長者維修自住物業津貼計劃」嘅攤位時，佢應邀試玩遊戲，喺盛情難卻下，佢同一位伯伯一齊玩。
不過，伯伯猛話唔識玩，林鄭就向伯伯逐一講解八個題目，佢話：「即係我哋依家有個計劃幫你哋啲長者維修屋企，如果你屋企天花石屎剝落，咁你覺得會唔會出錢幫你維修呢？」「咁要換無火煮食又會唔會幫你出錢呢？」呢個計劃成日被長者批評好複雜，喺林鄭親自解畫之下，伯伯竟然可以答啱晒，仲笑得好開心添。