早幾日立法會財委會討論高鐵撥款，焦點之一肯定係泛民嘅「拉布」戰略，但最後兩日嘅會議就有另一輪好戲，就係旅遊超人阿Paul謝偉俊極度不滿泛民「拉布」，單挑公文袋同「拉布之王」社民連。好多人都可能覺得奇怪，之前阿Paul喺議會都表現得較文靜，點解今次會忽然激進狂炳公社兩黨呢？
其實阿Paul決定由今年開始，無論喺議會見到乜嘢不滿事都會出聲，好似早前佢認為立法會調查甘乃威係咪行為不檢只會浪費公帑，佢就挺身而出提出終止調查動議，但最終都被否決。雖然出師未捷，但佢未見退縮，呢兩日大戰公文袋同社民連「拉布」更令唔少人刮目相看，佢中肯嘅發言亦令到好多市民留下良好印象。
阿Paul直斥兩黨「拉布」只係為嚟緊嘅補選造勢搶票，唔應該支持，但佢嘅紅顏知己「白姐姐」白韻琴一直都表明定會參加九龍西選區嘅補選，狙擊社民連嘅黃毓民，咁阿Paul肯定都會瞓身幫佢助選拉票啦。阿Paul咁搏命單挑公社兩黨，相信唔多唔少都係想吸多啲市民支持，到時補選可以幫白姐姐一把，可算係情義兩全嘞！