富貴黨常委田北辰拖埋黨內區議員「哪吒」方國珊同邵家輝出賽。田二少同哪吒都出動名錶，未戰先贏排場，田二少仲自嘲手上嗰隻係全世界最花嘅錶，皆因隻錶十年來跟佢游水、打波同爬山，搞到傷痕纍纍，所以玩野外定向，再刮花都唔心痛。

喺名人邀請賽上，白鴿黨嘅立法會議員黃成智同黨副主席「單雞」單仲偕伉儷亦有組隊，黃成智有要事在身，撐完兄弟起跑後就走人。鬥足兩粒半鐘後，單雞嗰隊得第三，建仔嗰隊攞第二，富貴黨冇獎攞。哪吒解釋跑得慢有原因，事關途中撞見一名外籍小童踩單車跌倒，佢同田二少上前為對方療傷，由得其他隊伍過頭。

講到受傷，主禮嘉賓、行會召集人CY梁振英都係傷兵，佢自爆聖誕期間喺日本滑雪時扭斷左膝蓋十字韌帶，尋日行路仲係拐拐吓。佢話喺雪地滑倒時左腳一度冇晒力，好彩滑雪了得嘅囝囝一直殿後，目睹爸爸受傷馬上衝前急救咋。