費事畀五區總辭潑冷水

但今次就有麻煩嘞，事關泛民喺下禮拜三宣布五區總辭，有兩個帳委會成員隨時辭職唔撈；而《議事規則》規定帳委會成員唔可以少過七個，所以主席黃宜弘就決定「劃線」，目標係喺二十七號前完成晒三份報告，費事一個唔該畀五區總辭盆冷水潑落嚟，幾份報告都唔知點算。

雖則帳委會好似為咗五區總辭要落雨收柴咁，但好彩委員對三個部門嘅問題都有接近嘅睇法，唔使花太多時間去爭拗，有望開多一兩次會就可以出到報告，而帳委會喺今個月二十一號同二十六號會再開會，睇嚟達標有望嘅。

其實，調查梁展文事件嘅專責委員會都可能受到五區總辭影響。雖然早前新世界中國主席鄭家純告專責委員會嘅官司敗訴，但委員會成員「長毛」梁國雄又自己額外攞錢出嚟同鄭家純打官司，依家仲向立法會行政管理委員會申請緊攞番律師費。如果遲啲畀鄭家純成功申請到上訴，長毛又辭咗職，到時都唔知喺邊度搵番個人畀佢告，當中牽涉嘅律師費又唔知點攤分，到時肯定又有排拗！