喺過去大半年，衞生防護中心總監曾浩輝帶領港人對付豬流感呢場馬拉松戰役，但原來佢跑真正嘅馬拉松比賽就非常水皮。雖然佢咁忙，但尋日晨咁早就一身運動look返咗母校華仁書院，出席由舊生組織搞嘅「華仁一家基金會」馬拉松特訓，仲同啲舊生同學弟分享佢參加馬拉松比賽嘅搞笑經驗添。
曾醫生話呢世人只係跑過兩次馬拉松，第一次喺讀中六嗰陣，係社長慫恿佢參加，因為不論輸贏都會幫個社攞到分，志在參與，比賽過程都係行吓跑吓，終於以倒數第十名衝線，幫個社攞到寶貴嘅一分。第二次係喺美國讀書嗰陣，佢為咗睇巡遊，於是先參加十公里馬拉松賽，佢當時特登買咗對新跑鞋去比賽，點知跑完後對腳痛到飛起，搞到返唔到學請咗兩日假。
佢用自己嘅慘痛經驗提醒其他華仁仔，千祈唔好着新跑鞋跑馬拉松，仲話希望可以同大家一齊跑下個月底嘅渣打馬拉松比賽喎。