唔知係咪前車可鑑，好似自稱「有三隻耳四隻眼」嘅社會福利署署長聶德權咁，負責嘅範疇由老人家到細路仔都關佢事，佢上任短短五個月就四出睇吓唔同階層嘅情況，掌握吓民情、民意。

夜青肯同三耳署長傾心事

三耳署長話做咗五個月，試過到處去睇吓前線員工點做嘢，有兩次跟外展社工隊出去探夜青，「夜媽媽」啲夜青當然唔知佢係乜水，有個夜青同佢講「我係嚟自DSW Wards嘅（即係社署署長作為監護人的兒童）」，署長即刻同番佢講「我都係DSW喎（即係Director of Social Welfare社署署長）」，更遞上卡片，二人隨即打開話匣子，署長仲叫個夜青有乜嘢事就email畀佢。

冇幾耐，個夜青真係send email畀署長傾心事，兼且作咗首歌自己彈埋send畀署長聽，署長聽完，仲覆番佢開解佢添。

又好似煲呔曾話要喺大埔搞校園驗毒試行計劃，但有班中學生大力反對，仲批評政府冇諮詢過佢哋，忽視年輕人嘅聲音，最後佢只係去學校做吓騷，但問題未解決。但連由佢高薪請返嚟、冇做過乜嘢成績嘅教育局政治助理楊哲安，都識得上facebook救火，同啲學生哥傾吓偈，了解佢哋嘅訴求。

呢排政府同市民嘅溝通方式備受批評，煲呔曾前幾日喺立法會答問大會畀啲議員問到反高鐵嘅「八十後」青年，佢把口淨係話關注，但轉個頭就縮沙唔肯同班「八十後」對話。

老實講，若果去到最後冇可能收拾嘅場面至對話，一切都已太遲，咪好似前晚喺立法會大樓外咁爆發警民衝突囉！所以呢，三耳署長同楊哲安事先疏導同親身接觸群眾嘅做法，正好摑咗匿喺深山嘅煲呔曾一巴。