小白觀點：幾百億撥款使得冤枉

有邊個唔知吸血貴利王得人驚，九出冇人知幾多歸，還唔到咯喎，屋企門口隨時畀人噴到花喱花碌，總之貴利就係生人勿近啦。

點知個社會福利署唔幫人就算啦，竟然叫有需要嘅朋友幫襯貴利王，呢啲咪叫靠害囉。喂，每年畀社署嘅撥款閒閒哋幾百億o架，之但係睇睇香港嘅社會福利政策，真係差到爆。

社署做嘢出名甩皮甩骨，冇手冇腳做唔到嘢就諸多留難，之但係要買副名牌眼鏡咩，問都唔問就批，仲有唔少老人家等緊宿位o架，等到死都未有着落呀！計我話，呢幾百億比起高鐵仲使得冤枉呀，唔該各位「80後」認清是非，反社署應該出師有名得多呀！

網友觀點……

EricHui

社署係咪自己搞私幫放數呀，叫人借貴利，想害死人咩。

天佑

嘩，有冇搞錯，做乜鬼社署吖，摺咗佢啦！

TingTing486

嘩，乜依家有社署+貴利王一條龍服務o架？導你升仙就有份！

ChiChil

社署介紹，係咪社署幫我還利息先？

網址：www.sunsiupak.blogspot.com

阿豪觀點：官員一片苦心撐企業

有人最近向社署申請緊急殮葬基金，為丈夫辦身後事，佢哋竟然叫對方「借大耳窿」搞掂佢。嘩！仲有冇人性o架？

戲都做得多啦，借大耳窿嘅債仔，有邊個有好下場？社署班官冇理由公然靠害㗎？諗諗吓，可能真係一片苦心。班高官成日將「大市場、小政府」掛喺嘴唇邊，大耳窿話晒都係私人公司，旗下應該有唔少員工，咪當係撐企業、保就業囉。

可惜有啲官始終係人蠢冇藥醫。呢位婦人正正因為丈夫過身，自己居港又唔夠七年，啱啱至畀房署叫佢從頭輪過公屋。試問一個連住址證明都可能提供唔到嘅人，叫大耳窿去邊度追數？佢哋又點會批出貸款呢？

網友觀點……

單眼佬

上樑不正下樑歪，社署小職員嘅所為，一啲都唔意外，市民自求多福，算罷啦！

匿名

真定假呀？如果係堅料，社署都應該做吓嘢，懲處有關職員啦。

禮儀師卜勤

職員一片好心，明知政府做嘢慢，叫佢借大耳窿，擔保人填「社署」，快好多！

阿煩達

社署幫唔到手就算啦，使唔使講啲咁涼薄嘅嘢呀，不如叫人捲埋條屍就咁掉咗佢啦……

網址：www.lukchiho.blogspot.com