小白觀點：以前玩「援交」冇咁變態

記得小白老弟那個年代，都玩過「援助交際」，但大家千祈唔好心邪，我只係見隔籬屋嘅豬女日日放學好乖咁返屋企溫習，於是援助咗幾本《兒童樂園》畀佢，當係交個朋友，可以得閒抄吓佢嘅功課咁咋。

但依家援交就唔係咁玩法，最近就有個十二歲女仔，志願做援交妹，先唔好講道德問題，弊在佢腦囟未生埋，畀個禽獸呃飲呃食搞埋，咁就真係蠢到冇人有。

依家香港嘅社會風氣差成咁，煲呔曾成日叫人生多幾個，真係靠害，咪話我話，援交好快成為一個優勢產業，各位家長喺造人之前要諗清諗楚，以免學豪伯平日話齋，生埋啲「10後」出嚟激自己呀。

網友觀點......

40後

依家啲小朋友點諗嘢，完全唔明解！

小白臉

教育太失敗，啲醫生、校長、教師近日頻頻發生風化案，讀得書少嘅援交妹更加唔懂分辨是非啦！

Christina

以前啲後生都話係唔好彩撞到衰人吖，依家啲細路自己衝埋去，真係唔抵幫！

老Ben

社會風氣問題，上網又易，老師家長又唔好好教導，分分鐘遇着賤格老師咪仲死，新聞幾多呀。

網址：www.sunsiupak.blogspot.com

阿豪觀點：嚴限入行保障工作安全

十七歲賤男懷疑引誘十二歲女仔援交，又食又拎，真係人神共憤。各位，依家援交問題愈嚟愈嚴重，根本睇唔到當局有咩「符Fit」去遏止。不如政府索性將援交產業化，嚴格控制十六歲或以下女仔唔畀入行，同保障佢哋有安全工作環境好過！

不過話要搞援交產業，以政府龜速嘅辦事效率，都唔知要拖到何年何月咯……到其時又唔知有幾多口靚妹慘遭毒手嘞……睇嚟，所有有志從事又或者現役援交從業員，都係要自求多福嘞。豪伯建議，應該由立法會泛民議員向佢哋開班教授危機處理。你知啦，佢哋玩「拉布」咁叻，援交少女遇到變態佬時學到佢哋一半火候，都肯定拖到救兵嚟到啦！

網友觀點......

尖頭文

真係睇唔到政府做緊乜嘢，主動去遏止援交風氣。

公安

啲援交妹唔舉報警方就已經冇符啦，仲唔係間接助長援交歪風！

煲呔

「80後」未搞掂，又要諗埋「90後」，今次真係頭痕！都係改口，叫人唔好生仔好過喇！

神農氏

都要啲G妹自己識保護自己至得㗎，下下要外人幫，幫得幾多呀？慈善團體呀？

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

真假鏹魔疑雲