高鐵香港段撥款審議案一拖再拖，支持高鐵計劃嘅建制派一忍再忍，第三次會議審議前，有人呼籲着紅色衫以示支持，尋日開會，議會三十多個建制議員，只有謝偉俊（Paul）最聽話，着咗全身紅色嘅運動裝，佢仲畀人睇埋個底、底衫啫，都係紅色㗎。雖然畀人笑似聖誕老人，但特立獨行慣嘅阿Paul一啲都冇理會，仲話夠晒溫暖添。
撐高鐵團體中，富貴黨同分裂出去嘅經濟動力尋日不約而同發功，富貴黨幾十人一早就喺立法會停車場請願，要求財委會盡快通過撥款，黨主席劉健儀更準備咗「撐高鐵、反拉布」貼紙，派畀一眾支持高鐵嘅議員貼喺身上，兼且每位議員一封信，內容大意係唔認同拉布行動，希望財委會盡快通過撥款。
經濟動力就大手筆得多，朝早搞咗個開篷花車巡遊到尖東星光大道，要求遊客簽名支持高鐵，下晝仲拉埋黃宜弘、黃定光等上花車，實行撐高鐵遊車河。