政府委任安排錯漏百出，本報早幾日先踢爆平機會主席真空，搞到無人駕駛，事後政制及內地事務局急急補鑊。尋日政府出憲報又自捅漏洞，因為政府刊憲公告天文台台長李本瀅舊年十一月十一日已經開始做真台長，點解遲成兩個月先登憲報呢？公務員事務局發言人話係程序所需，呢個解釋真係幾唔合情理，不如話佢哋當李本瀅呢個天文台台長透明咗兩個月仲貼切啲。
公務員事務局話，李本瀅喺舊年五月十一日已接上手林超英嘅空缺、開始署任天文台台長，半年後嘅十一月十一日，仲正式升任天文台台長，至於家吓先公布，佢就話內部要處理刊憲嘅程序喎！登個升職公告都要兩個月，政府嘅效率真係得人驚。
最離譜嘅係成件事有漏招之嫌，事關天文台台長係個重要職位，遇到八號風球等惡劣天氣時，具有法定權力嘅天文台台長要喺憲報刊公告，話明幾時有個颱風影響香港，公告嘅內容影響千萬公司運作，如職員加班津貼點計、航空或保險等公司面臨嘅賠償糾紛同轇轕由幾時生效等，所以李本瀅嘅任期好重要，政府話佢舊年十一月已經做咗台長，但邊個知呢﹖唔刊憲就靜雞雞行使權力，政府唔通當埋市民係透明嘅？