高鐵香港段撥款審議今日再玩過，議會內外處處係輸家，工聯會更先嘗苦果，事關工聯會一早決定今日喺東莞舉辦高爾夫球邀請賽，仲請到高官唐英年同陳家強主禮，立法會四位議員林健鋒、梁君彥、劉皇發同黃宜弘參賽，但高鐵一再拉布，今日佢哋全部要留守議事堂，高球賽嘅重要嘉賓全部缺席，工聯會呢個一桿入洞谷聲勢嘅好夢都要落空啦。
工聯會轄下嘅金融專業委員會，該會主任由工聯會會長鄭耀棠出任，○七年主辦咗深港金融業高球賽，今年再搞就請到唐英年同陳家強助陣，又有四位立法會議員參賽，可謂係威係勢。可惜人算不如天算，據知唐唐同陳家強已通知棠哥要留守香港，無法抽身北上嘞，而四位本來打算喺球賽中一展身手、最好打個「小鳥」出嚟嘅議員，就變成放鴿兼放飛機。