高鐵香港段撥款一拖再拖，港府束手無策咁。去咗美國訪問嘅政務司司長唐英年據講專登早啲結束行程返港想為高鐵助陣，但尋日佢一開腔就爆出笑話，佢話：「我哋唔能夠議而不決，依家係要決定嘅時候。」呢句議而不決係國家領導人贈畀港府官員嘅，估唔到唐唐攞去贈畀立法會，真係五十步笑百步囉。
坐完長途機嘅唐唐前日已經現身立法會答問大會，尋日立法會財委會繼續審議高鐵撥款案前，唐唐即刻扮演救火隊嘅角色，呼籲議員盡快審議及通過，仲用埋議而不決呢句名言，係人都知，議而不決向來都係政府嘅「專利」，好多政策及大型項目動輒拖上十年八載，原因就係政府議而不決，今次由代表政府嘅唐唐大大聲叫立會唔好議而不決，都可算搞笑，但港府同議會都議而不決，港人真大鑊！