高鐵撥款、五區辭職、鏹雨再降，香港政府面對嘅問題多籮籮，但煲呔曾就好似懶理呢啲深層次矛盾咁，近期頻頻落區獵食，繼早前入元朗洪水橋品嘗名不虛傳嘅「奶茶王」大發奶茶後，事隔半個月，佢上周日又再落西區覓食，扮晒老定咁。
當晚七點，煲呔曾一行六人現身西環桂香街嘅街坊菜館坤記煲仔小菜醫肚，上次去大發時，曾經勞師動眾出動便衣警員鎮守門口，今次驟眼睇就冇便衣，煲呔曾一行就瑟縮喺近門口嘅角落位度，佢只顧品嘗煲仔飯，食客想同佢交流都幾難。期間，坤記嘅老闆娘喺門口維持秩序，見有途人對住煲呔曾指指點點，就叫人走同唔好影相添，煲呔曾喺度食飯，佢都要做多啲嘢。
講番間坤記，據講煲仔飯最出名，飯焦焦而不燶，吸晒豉油同臘味嘅油，係唔少西環街坊嘅「飛佛」。該店幾乎晚晚爆滿，訂枱熱線更長期打唔通添。