煲呔曾前日喺立法會一改口風，承認本港深層次矛盾唔單止有經濟，仲包括政治及社會矛盾，低收入人士更係雪上加霜添，所以佢改口話政府會推出措施紓解民困。不過，所謂紓困措施真係好細，搵放大鏡至睇得清楚，包括議員爭取多時嘅學童上網費資助同偏遠地區居民跨區交通津貼。

上網資助跨區交津被截

立法會政黨過去一直爭取將學童上網費用納入綜援計劃內，但當局卻認為上網費係「理想需要」而拒絕，雙方講到口水乾都係講緊涉及每年一、兩千萬元開支。至於跨區津貼涉及開支可能較多，但只視乎延長及擴大範圍，涉及每年開支都係一、兩億元，同過去十五個月包括財政預算案及其後加碼措施八百五十億元相比，可謂九牛一毛。

孖曾兄弟諗縮數已經抵鬧，更離譜係強搶下屬成果畀自己邀功，有勞工界議員踢爆，學童上網費資助同跨區交通津貼兩項政策均由張建宗負責，最近終於有啲眉目，隨時可以公布啟動，可惜中途畀鬍鬚曾截住，唔使問，呢輪宣傳片成日可見匿埋暗角位聽意見嘅鬚鬍曾，肯定係出到鬼祟手法，劫咗呢啲項目喺預算案充數啦，難為張建宗啱啱先喺禮拜三大會畀議員用四條口頭質詢，佢只能遊花園、被人譏為練咗鐵布衫神功，其實佢係啞子吃黃連，有口說不出，惟有帶議員遊花園捱鬧啫。