「宜婚娶」、「宜動土」嘅《通勝》就話見得多啫，手術人命關天，應做就要即刻做啦，點解仲要擇日？咁就要問吓食衞局局長周一嶽咯。

呢，七十歲嘅王伯上月中喺街上暈倒，送入伊利沙伯醫院。醫生發現佢血管病變及主幹動脈栓塞，要做心臟搭橋手術，但王伯留院兩個禮拜，家人都約唔到醫生傾幾時做手術。

追問護士至知，原來醫生逢禮拜五舉行心臟內科及外科聯席會議傾手術安排，但連續兩個禮拜五撞正聖誕同元旦，醫生放假大過天，會議兩度取消。王伯左等右等，卒之因為心口痛送入深切治療部，做「通波仔」手術期間突然昏迷，當晚過身。

伊利沙伯醫院事後承認，因為資源同人手問題未能安排手術：「已經錯過最好手術時間！」王伯病發前行得走得，可以買餸煮飯，照顧自己，因為醫生放「紅假」，家屬痛失親人，做手術變咗做「白事」，院方一句資源不足就算數，叫人點接受呀？

叮！醫生放假大過天，兩個禮拜唔開會，病人等到命都冇埋，唔通市民真係要擇日發病，配合醫生擇日做手術？唔通病人錯過「吉日」，就只能貴客自理？正如王伯親友話齋，資源唔應該成為決定病人生死嘅因素，懷疑因為醫管局高層狂加人工，病人應得嘅資源畀人分薄晒。

又難怪親友咁扯火嘅。嗱，醫管局舊年整體撥款三百一十億，其中薪金支出佔咗八成五，即係話用嚟買設備同藥物嘅錢只得百分之十五。醫管局五名最高薪管理層，人工加埋二千一百萬，其中前九龍西聯網總監趙莉莉退休「翻閹」攞雙份，年薪唔止高過行政總裁蘇利民，甚至多過煲呔曾添。

至弊管理層人工一流，蠶食咗大部分資源，但公共醫療服務質素就九流，醫療事故不斷，而且愈爆愈得人驚。醫管局對病人愈來愈涼薄，整個《藥物名冊》出嚟，開藥要分貴賤，搞到曾經爆出「先錢後醫」嘅醜聞。最奇怪嘅係，港府竟然不聞不問，有醫管局高層月月出雙糧，同樣係粒聲唔出扮鵪鶉。

最荒謬就係肥上瘦下。沙士爆發至今接近七年，醫管局基層醫護薪酬加幅唔到百分之五，但有高層連續四年加薪，整體加幅兩成。唔怪得前線員工士氣低落，醫生同護士大批「逃亡」啦。

係噃，唔差在喺《擇日通書》加埋「宜滾蛋」，睇吓周一鑊呢班醫療庸官幾時收皮啦。叮！