年前因為雙眼患上白內障，前政務司司長「肥龍」許仕仁要入院做手術，尋日喺馬場撞到佢，問依家雙眼咩情況，佢話白內障好番晒嘞，但青光眼就冇得斷尾，唔惡化已經算好彩。點解搞成咁？佢太太就搶住答：「咪做嗰兩年搞成咁囉！」不過，肥龍就極力否認，話呢個病唔關做嘢事喎。「嗰兩年」係乜？如果唔係講緊做政務司司長嗰兩年，又會係乜呢？
雖然肥龍青光眼未愈，但冇影響佢養馬嘅眼光，佢有份嘅皇仁舊生團體馬「福龍」尋日以次熱姿態跑出，贏得超過二十七萬元頭馬獎金。
肥龍又自爆向來信中醫多過西醫，因此即使佢係年過六十五歲嘅高危人士，都冇響應政府呼籲打豬流感針。好彩佢依家已經冇做高官，否則就要被迫打針，隨時冇病都會打到病！