本文重點
鏹水彈狂徒日前又再出沒，仲將魔爪延伸到旅遊景點廟街，由○八年至今發生多宗鏹水彈傷人案，兇徒次次都揀人流極旺嘅行人專用區犯案。身兼行政會議成員嘅工聯會會長鄭耀棠尋日竟然無懼「鏹魔」肆虐，專登喺旺角西洋菜街行人專用區搞簽名會，仲企正喺路中心冇瓦遮頭嘅地方「嗌咪」，呼籲市民支持政制向前走。
語出驚人 更具殺傷力
有記者問棠哥係咪唔怕鏹水彈？佢直言冇有怕，因為佢堅信愈危險嘅地方愈安全。佢笑言打仗時每當有地雷爆炸後，軍人都會跳入地雷炸出嚟嘅窿作掩護，因為同一個地方唔會「爆完又爆」，所以匿喺嗰度就最安全，棠哥由此推論旺角行人專用區會同地雷窿一樣咁安全。不過，睇番「鏹魔」嘅犯案記錄，單喺旺角西洋菜南街就已經掟過三次鏹水彈，傷者夾夾埋埋有成百人，睇嚟地雷窿都未必如棠哥所言咁安全喎。
又難怪棠哥咁樣講嘅，好似佢日前批評元旦遊行衝擊中聯辦嘅行為令中央「非常震驚」，仲笑言如果衝擊人數多北京就要派兵，此話一出即時令各界嘩然！其實佢十足枚導彈咁，計殺傷力，鏹水彈簡直濕濕碎啦！