本文重點
公文袋同社民連將於今日公布五區總辭嘅詳細計劃，鐵定喺呢個月二十七號正式向立法會遞信辭職。政界同學者一般估計，五名辭職議員當中，以新界西嘅社民連陳偉業、九龍東嘅公文袋袋巾傑同新界東嘅社民連梁國雄，最有機會唔能夠當選重返立法會，估唔到連《通勝》都係咁講。
對屬羊者極唔老利
《通勝》話呢個月二十七號即農曆十二月十三，喺生肖上係「沖羊」，即係對羊年出世嘅人最不利，咁啱喺五五年出生嘅陳偉業就係屬羊，可以話係唔老利之極，唔怪得之佢成日話想換人參選啦。
《通勝》又話，當日喺方位上係「煞東」，即係最不利東邊，按立法會五大地方選區劃分，就係最不利九東同新東。事實上泛民喺上屆立法會選舉，整體得票率最低正係呢兩區，真係唔使問師傅都知濕滯。
至於當日最適宜同最避忌做乜嘢呢？《通勝》話最適宜就係掃走晒啲垃圾同污糟嘢，喺生肖同方位方面，亦正正係「沖羊煞東」，預示五名辭職議員之中，分分鐘會輸足三席，甚至乎一鋪清袋，佢哋今次真係捉蟲囉！