本文重點
泛民主派喺上禮拜五嘅立法會財委會又重施拉布故技，高鐵撥款申請又要押後表決。當晚會議後，建制派嘅黃定光、黃國健同潘佩璆衝前同財委會主席劉慧卿理論。事後唔少建制派議員都炮轟本身嚟自泛民主派嘅卿姐控制會議時間不力，甚至質疑佢刻意夾埋其他泛民一齊拉布，有建制派議員揚言會對卿姐提出不信任動議，其中主力「倒卿」嘅建仔隨即喺翌日上晝政制事務委員會開會期間，召集各大建制派頭頭喺立法會前廳舉行咗個秘密會議，為有關行動拉票，但就遭部分獨立建制派議員反對。
議事規則有漏洞
反對「倒卿」嘅議員並非認為卿姐主持會議冇問題，而係擔心咁做反而會中咗班拉布議員嘅詭計，令高鐵撥款再開多幾次會都傾唔完。當中有議員指財委會議事規程根本冇不信任主席動議呢個機制，泛民單係爭拗有關程序，又可以拖你一兩粒鐘，之後仲要就動議本身進行辯論同投票，以及提名同選舉新主席等，最後無論行動成功與否，隨時可以玩足五、六粒鐘，成個禮拜五晚嗰三節財委會會議可能咁就冇咗，咁等如自己掟蕉皮畀自己踩，得不償失。
有個別建制派議員更認為拉布鬧劇搞得成，係因為議事規則本身有漏洞，同邊個做主席冇關，繼續由卿姐做主席，起碼佢班白鴿黨黨友會畀番幾分薄面，如果換咗係建制派，分分鐘會畀泛民玩到連會都開唔成；而且卿姐某程度已向政府同建制派作出讓步，答應呢個禮拜五再連開三節會，禮拜六更加會由朝開到晚喪審高鐵撥款，如果咁都傾唔完，建制派先再諗下一步點做都未遲，於是「倒卿」動議就縮沙嘞！
有曾經倒戈支持卿姐嘅建制派議員承認今次事件多少影響到佢哋對卿姐嘅睇法，來年未必會再投票畀佢，又話會建議修改議事規則，效法外國引入一啲防拉布機制。亦有泛民議員認為由卿姐做主席，反而令佢哋唔敢玩得太盡，不如喺不記名投票中倒戈拉倒卿姐，換番個建制派做主席，佢哋以後就可以大玩特玩嘞。