小白觀點：高官打針騷信唔過

政府成日叫人打豬流感針，講到唔打實聽領嘢咁，弊在依家有個醫生唔打好好哋，打咗之後就癱癱哋，咁鬼牙煙嘅嘢，比X-Game仲危險，畀着你又敢唔敢試試呢？不過，有人可能會駁嘴駁舌話唔係喎，煲呔曾唔係拖埋成班高官出嚟做咗場打針騷咩？依家一個二個依然生勾勾，就證明豬流感疫苗安全啦！

哼！呢個論點真係廢到冇朋友，唔該睇睇啲高官面皮有幾厚先啦，手臂嘅皮九成九亦厚到連支針都拮唔到入去呀！更何況，邊個知佢哋打嘅係唔係羊胎素扮豬流感疫苗㗎！唔係喇，喺度向豪伯下戰書先，如果佢肯打，我小白老弟就算拚咗條小命都誓死奉陪打……個麻辣邊爐啦！

網友觀點...X）...

[　Jason Ma　]

愈爆愈多嘢，打咗出事點算呀！

[　小肥龍　]

諗吓先啦，我點知我自己有冇暗病㗎，連醫生都評估唔到自己，一陣打咗激發起副作用咪弊，咪搞！

[　任我行　]

本來冇事，打咗出事，都幾鬼驚！

[　Jenny88　]

愈講愈驚，問題係豬流感針嘅副作用係死得人，情願增強抵抗力，注意衞生，最多咪唔出街囉！

網址：www.sunsiupak.blogspot.com

阿豪觀點：夠膽唔代表唔賴嘢

豬流感來勢洶洶，本來有疫苗就梗係要第一時間打㗎啦，尤其係嗰啲高危人士，不過本港接連傳出懷疑有人打完針後出現副作用，有人仲性命垂危添。咁搞法，真係分分鐘打又死唔打又死喎……

當然啦，如果因為唔知打豬流感疫苗安唔安全，就去周圍問人「夠唔夠膽打針」，其實係好無謂嘅，亦會中咗煲呔曾同周一鑊等高官嘅計。佢哋帶頭做騷打針，冇錯可以代表佢哋「夠膽」，但係「夠膽」唔代表唔會賴嘢。就正如我「夠膽」唔用安全繩索玩笨豬跳，但係結果係點，都唔使多講喇啩！所以話呢，小白兄，我係唔會中你嘅激將法嘅，打麻辣邊爐就可以隨時奉陪！

網友觀點...X）...

[　b模　]

打咗針唔一定唔會感染豬流感，都係靠自己抵抗力好啲。

[　肚皮大過波　]

我覺得睇人啦，如果係小朋友、老人家，都係打針好啲，如果係年輕力壯嘅，咪睇定啲先囉！

[　super cat　]

其實出現副作用嘅機會點都低過中豬流感，我諗打針博得過嘅……

[　豬標王　]

快快趣改行去養豬，將自己變成高危人士，咪焗住去打囉，唔使煩。

網址：www.lukchiho.blogspot.com