冇錯，講嘅就係打豬流感防疫針。全球各地不斷出現懷疑注射豬流感疫苗引致副作用個案，市民對疫苗本來已經信心麻麻，咁多負面新聞，更加心大心細，擔心打咗之後會「中招」。

話口未完，本港已出現首宗注射豬流感疫苗後引致吉巴氏綜合症。一名私家醫生上月底接種疫苗之後出現嚴重副作用，除咗下肢冇力外，雙手亦開始冇力，呈現吉巴氏綜合症徵狀，病情幾個禮拜內可能逐步惡化，最嚴重會全身癱瘓甚至死亡。

打完豬流感疫苗即刻出現吉巴氏綜合症，衞生署衞生防護中心總監曾浩輝居然仲話，每年本港都有幾十宗同疫苗無關嘅吉巴氏綜合症，依家好難做結論。除非打咗第一批五十萬針疫苗之後出現四宗，或者一至二月突然有二、三十宗，咁就響警號嘞。

咦，咁咪大鑊？嗱，呢次疫苗接種計劃因為當局匆匆推出，但宣傳唔夠，冇乜人幫襯，咁耐至得十萬人接種，唔知等到幾時至打晒第一批五十萬劑。如果大吉利是啲疫苗被證實係「元兇」，到時唔知有幾多人領咗嘢。嗰陣至拉警報，遲唔遲啲呀？

班官烏吓烏吓，唔知噏乜。都係港大微生物學系系主任袁國勇夠直接，話如果市民食雞蛋後有口腫同面腫嘅過敏反應，就唔適宜接種豬流感疫苗。

叮！請問衞生署署長林秉恩，印象中你哋似乎未畀過呢類「溫馨提示」噃。講真，家陣市民需要嘅，唔係令佢哋無所適從嘅「專業意見」，而係要當局提供清晰指引，話畀市民知疫苗可能存在嘅風險，邊類人唔適宜接種等等。

查實，當局注射豬流感疫苗嘅安排，由頭到尾都得個亂字。開始嗰陣對於買唔買疫苗猶豫不決，因為扑鎚太遲，啲疫苗遲遲都未到，但懷疑疫苗可能導致嚴重後果嘅消息，已經嚇窒晒香港人啦。

卒之等到第一批疫苗抵埠，當局又好做唔做，要市民簽張「生死狀」至打得，結果又衰多一鑊。仲有，以往打季節性流感針，班官員從來唔會集體接種，呢次突然個個捋高衫袖做騷。正一此地無銀三百両，愈係高調，市民反而愈怕怕。

出現首宗懷疑豬流感疫苗引致吉巴氏綜合症後，尋日接種豬流感疫苗嘅市民大幅減少，好多人甚至臨時甩底。

當局叫市民快啲去接種疫苗，但風險披露好似擠牙膏咁，出咗事至講少少，呢次個案仲有延誤公布隱瞞之嫌。如果當局有心幫市民嘅，唔該快快將疫苗嘅風險講清講楚。叮！