消息話，Jeffrey已向政府當局傳達訊息，表明有意亦有能力擔任旅發局主席。Jeffrey突然毛遂自薦，令政府官員錯愕之餘，亦感到為難。事關按照公職人員「六六制」，即擔任公職不多過六個及同一職務不長過六年嘅原則，田少○七年先執掌旅發局，一般可獲續任至少一屆（三年）；更何況田少入主後，旅發局一直平安大吉，即使喺金融海嘯衝擊下，○九年來港旅客數字亦有望力保不失，田少冇功都有勞。如果政府喺缺乏有力理據下唔同田少續約，等如挑釁富貴黨，相關官員又想唔想無端端捲入呢個政治漩渦呢？

Jeffrey話晒出身富貴黨，突然想截田少胡，唔知係咪同經濟動力部署開拓功能組別議席有關呢？但佢否認想爭旅發局主席個位。咁有冇興趣執掌旅發局？佢話唔答假設性問題。

田少就話未聽聞扮嘢文同Jeffrey有機會接佢棒，仲話佢喺過去三年好投入旅發局工作，好似推動美酒佳餚節同除夕煙火倒數咁，今年旅發局仲會重辦國際龍舟賽，佢希望未來三年可以親身督導落實措施，為香港經濟繼續出力。言下之意，即係田少都希望繼續做落去。