身兼行政會議成員嘅工聯會會長鄭耀棠前日公開話元旦大遊行嘅示威者，衝擊猶如外交部大使館嘅中聯辦令北京「非常震驚」，點知擰轉面就死口唔認，指自己唔代表北京，亦無法捉摸中央嘅諗法，仲話佢冇提過「震驚」呢個詞語，旋即惹起爭議，被質疑擘大眼講大話。
一夜過後，棠哥終於知衰，尋日補鑊話自己睇番電視，先至記起佢真係講過「非常震驚」四個字，仲為自己「突然失憶」開脫，指平時好少用震驚呢啲詞彙，仲話佢嘅記憶力衰退到令自己震驚，所以一定唔係刻意隱瞞，亦唔係受壓先轉口風喎！
其實棠哥「突然失憶」早有前科，佢周不時都違反行會集體負責制，公然同政府唱反調。例如行會通過咗公務員減薪方案後，棠哥就話工會點都唔想政府帶頭減薪；政府決定唔起居屋後，佢又話樓價太高市民買唔起樓，點都要起番居屋，事後佢都係話「一時醒唔起」自己係行會成員先講錯嘢。
究竟佢係真失憶定盡爆心中情？只有佢自己知嘞！但若然佢真係記憶力衰退嘅話，不妨食多啲補腦食品補吓吖！