賭王三太陳婉珍向來愛做善事，原來係深得媽媽鄒蓮真傳。尋日以陳媽媽個名命名嘅「東華三院鄒蓮女士長者日間護理中心」舉行開幕禮，三太同姐姐婉清帶埋超蓮一齊參觀中心，希望畀受助老人家一個有home-feel嘅舒適「遊樂場」，以圓母願。
陳媽媽生前兒孫滿堂，但見到冇人照顧嘅長者要住老人院都會忍唔住留下同情淚，所以陳媽媽仙遊後，三太同兄弟姊妹決定將媽咪剩低嘅錢回饋老人服務。東華三院主席李三元話香港愈嚟愈老化，老人服務需求好大。本身係東華總理嘅三太話東華辦慈善好有經驗，所以今次搞老人中心佢都好放心，唔使問賭王意見。
陪住媽咪參觀嘅超蓮就大讚婆婆呢二百萬元使得好有價值。超蓮同啲長者有傾有講，仲同姨媽一齊學摺毛巾花，玩得不亦樂乎。超蓮話自細就跟住婆婆大，個「蓮」字仲係跟住婆婆個名改嘅添，所以兩婆孫感情好好，細個有親乜嘢事仲會搵婆婆做擋箭牌添。