話說特別會議否決畀公共專業聯盟再去反映意見後，早前被反高鐵團體踢爆涉嫌有利益衝突嘅專業會議成員何鍾泰主動開腔，話公共專業聯盟埋怨畀政府屈，好似好委屈咁，其實佢先係委屈，跟住申報利益話係一間公司嘅獨立非執董，但冇存在任何利益衝突。

見到何鍾泰叫冤，財委會主席劉慧卿順水推舟，叫在座嘅同僚有乜嘢需要申報就一次過講晒喇！此話一出，班同僚爭相申報，富貴黨副主席方剛又呼冤，話自己其實同大角咀苦主聯盟一樣都係苦主嚟。換言之，即係佢有物業喺嗰度啦！過咗一陣，佢好似突然醒起漏報，再申報佢係九倉非執董，但冇參與任何實際工作。

跟住工聯會嘅潘佩璆就申報持有少量港鐵股票。股票？似乎唔多有關喎！唔知係咪睇見有同僚申報物業，專業會議嘅梁美芬同建仔嘅李慧琼有樣學樣，先後申報喺紅磡同西九有物業。及後，有幾個身兼市建局成員嘅議員又申報利益，話因為市建局可能涉及大角咀嘅重建項目喎！後來，潘佩璆再兜底，申報喺西九有物業，驚死蝕底咁。

難怪市民不滿率飆升

本來已經愈划愈遠，會計界嘅陳茂波又申報係西九文化管理局嘅成員，白鴿黨嘅黃成智更離譜，竟然申報啱啱幫港鐵搞咗個講座。由法律超人變咗旅遊超人嘅謝偉俊又話要申報，申報乜嘢？真係講你都唔信，佢話高鐵涉及旅遊，所以要申報喎！高鐵幾時得嚟對香港有旅遊收益呀？

到底班尊貴嘅議員知唔知乜嘢係利益衝突？咪當啲市民係傻仔先得㗎！申報利益本來係件好嚴肅嘅事，佢哋搞到好似玩泥沙咁亂申報，唔怪得市民對立法會議員嘅表現唔滿意率大幅飆升啦！