呢座斥資四億幾嘅大樓設計夠晒豪華，有人仲話係勞斯萊斯式建築，特別係二樓嗰個大型會議廳，佔地四百平方米，有百幾個座位，不知幾有氣勢，但實用性就認真麻麻。梯級座位令與會者行動不便，一唔小心就會仆低。殘障人士更麻煩，輪椅入唔到，吓吓要人扶。

講到會議廳嘅使用率就更加失禮。以○八年為例，全年加埋晒先至用咗二十二日咁大把，其他時間都丟空。更奇嘅係，醫管局有啲會議，比如每年嘅研討大會本來可以喺度開，但係局方偏偏要去會展中心租場開會。唔通佢哋一早就覺得個會議廳唔掂？

更弊嘅係，呢個會議廳「財多身子弱」，要用錢嚟吊命。事關設計時一味貪靚夾攞威，室內裝修都用木料，點知香港氣候潮濕，木料容易發霉，醫管局就諗咗條屎橋，二十四小時開冷氣保持乾爽，不知嘥咗幾多電費。

正所謂小數怕長計，咁樣Fing錢法，容乜易坐食山崩呀。之但係，醫管局使阿公嘅錢一啲都唔心痛，足足拖咗十二年，直到舊年先至「醒覺」唔合環保原則，申請一千二百萬元撥款改裝會議廳，希望節省能源及提升使用率咁話。

但奇怪嘅係，醫管局對呢項工程異常「低調」。當初向食物及衞生局申請撥款，話係「改善工程」，令立法會及公眾無法知道撥款嘅具體用途。醫管局仲喺文件中表明，工程屬「內部行政工作」，唔會對外公布，如果傳媒查詢，只會回覆有關工程係該局「正常辦公室維修項目」。咁鬼鬼祟祟，更加令人生疑。

講真啦，成件事都幾荒謬。正如有業界人士話齋，醫管局真係大白象，冇做好規劃，就搞個咁豪華嘅會議廳，一年先至用二十二日，證明根本冇咁嘅需要，長開冷氣防霉更係戇居，唔通冇其他方法咩？依家仲要攞千幾萬執手尾，直情係嘥完再嘥。千幾萬唔係小數目嚟㗎，可以買好多醫療器械，用喺病人身上，話唔埋可以救番好多條命。

鬼咩，醫管局不嬲都係應該用嘅唔用，唔應該用嘅就亂用一通。為高層加人工不知幾爽手，但講到撥款增加前線醫護人手就耍手擰頭。佢哋可以動用巨款起呢啲唔等使嘅豪華會議廳，但係有三十萬人口嘅天水圍要求起一間公立醫院，醫管局同政府都拖得就拖，依家連選址都未搞掂，唔知何年何月先至落實。

一句講到尾，醫管局嘥咁多公帑搞出個大頭佛，依家補鑊又要納稅人埋單，點可以咁容易畀佢哋過關呀。如果唔緊佢哋，千幾萬掟咗落鹹水海不特止，以後仲唔知要幾多錢填氹。醫管局主席胡定旭一定要向公眾交代清楚。