財爺鬍鬚曾原訂前日上京拜訪中央一眾財金官員，但係天意弄人，此行撞正北京暴雪，航班由前日下晝改為尋日朝早八點半，最終因為天氣惡劣而被迫取消埋。之不過，佢一話取消行程，北京場大雪就停咗，真係夠晒離奇。
財政司司長辦公室話鬍鬚曾尋日朝早已登機，但因為前赴北京嘅班次混亂，唔知幾時先可以起飛，估計最快要到尋日黃昏先有望抵達北京，所以索性取消行程。上京不成，鬍鬚曾發揮阿Q精神話：「遲啲（上京）唔緊要，我哋會兩條腿走路，安排另一個時間上去，另外由金管局同局方（財經事務及庫務局）直接同有關部委接觸，就一啲較具體嘅事件，我哋做得到嘅嘢，依家已開始傾。」今次已經係鬍鬚曾繼舊年十月後第二次無法敲開北京嘅門，事件唔單止離奇，仲古怪添。