立法會內務委員會將喺禮拜五推選有關白鴿黨議員甘乃威求愛不遂炒女助理調查委員會嘅七名成員，但尋日截止報名，都只得梁劉柔芬、劉江華、梁美芬同林大輝四名「鐵腳」交咗表。雖然議員原則上可以等到禮拜五正式選舉時先即場報名，但由於泛民主派早已講明杯葛調查，曾被點名要求交人嘅工聯會同富貴黨亦以唔同理由堅拒派人，所以點計都唔夠數。
曾經對甘威處境表示同情嘅大輝話，如果真係冇人肯自願參加，就無謂夾硬屈人入會喇，不如乾脆終止調查放生甘威好過！
但有熟悉《議事規則》嘅人士話，規則訂明議員只能喺譴責動議提出當日，即場動議另一項議案終止繼續調查，但呢招已畀旅遊界謝偉俊用咗，唔能夠再次提出，現階段冇其他方法可叫停調查，因此即使調查委員會因為唔夠法定人數成立唔到，調查亦只算無限期擱置，唔算正式撤銷，只要喺本屆立法會餘下兩年幾任期內，突然間又湊夠七名議員入會，整個調查同譴責程序又可重新啟動。
如果上述分析正確，甘威嚴格嚟講仲未算甩到身，尤其五名泛民議員將會辭職，外界估計隨時有三至四人選唔番入嚟，如果新當選嘅建制派議員願意接呢舊燙手山芋，重新啟動調查，到時泛民又唔夠人數否決譴責動議，咁甘威個議席就凍過水。