工展會營業額高過舊年

今年工展會後勁凌厲，入場人次超過二百二十萬，營業額高過舊年，亦反映市民消費力強勁。黃友嘉話從工展會嘅銷情嚟睇，香港喺金融海嘯後嘅復甦速度相當不俗，估計今年經濟漸趨穩定，本地生產總值可望有百分之三至三點五嘅增幅。

咦！煲呔曾話年中會有雙底衰退，黃友嘉咁講，咪同煲呔曾唱反調？擁有美國芝加哥大學經濟博士學位嘅黃友嘉話，提雙底衰退論嘅人係特首，廠商會自然要審慎樂觀、唔會掉以輕心啦，但佢個人睇經濟唔會齋睇一年，各國政府喺退市後市場係點仲係未知之數，估計就算會雙底衰退，都係二○一一年嘅事。到底煲呔曾同黃友嘉邊個眼光準啲？年中就會揭盅嘞！