北角係福建人聚居嘅地方，身為同鄉嘅建仔立法會前議員「蔡菜子」蔡素玉亦以該區為「米倉」，即係票倉。不過，由立法會議員葉劉淑儀牽頭嘅匯賢智庫，竟然喺北角開咗個新嘅社區服務中心，尋日仲搵埋福建社團聯會永遠名譽會長盧文端，同聯會主席林樹哲兩名猛人為新中心開幕，即係擺明車馬搶「米」啦！
本身係建仔監委會副主席嘅盧文端話今次畀面支持葉劉，係因為自葉劉喺工業署做嘅時候已經識佢，換言之係十幾年老友。佢仲開埋金口話葉劉有乜需要幫手嘅話，開句聲就得嘞！葉劉亦以福建話講番句「多謝」回應，又話今次其實係搬竇啫，事關西灣河嘅服務中心租約期滿，所以咪搬嚟交通更方便嘅北角囉！不過，新中心地方大咗，租金自然貴啲，七百幾呎要萬七蚊一個月㗎！
依家葉劉喺蔡菜子嘅米倉插旗，到底會唔會令某人唔開心呢？盧文端笑笑口咁話佢根本冇票喺手，所以冇問題嘅！但得到佢幫手嘅話就如虎添翼，試問點會唔令人眼紅呢？
同場仲有策發會委員史泰祖，史泰祖對五區補選興趣唔大，一來佢習慣咗依家嘅生活，加上佢覺得自己勝算唔大喎！唔通佢擔心做炮灰？