但係基本法委員會副主任梁愛詩尋日出席香港僑界社團聯會舉行嘅政改座談會時，就踢爆泛民其實係喺度自欺欺人，五區總辭根本只會有輸冇贏。佢話五名準備辭職嘅泛民議員，本來就係喺有關選區選出，佢哋喺補選中重新當選根本就係應分嘅，最多只算打回原形、冇贏冇輸，但只要佢哋求其有一個人選輸，整個五區總辭同變相公投行動就等於輸咗。咁即係詩姐都批死五區總辭有輸冇贏啦！

納稅人先輸億五公帑

最諷刺嘅係，詩姐自爆呢個「總辭有輸冇贏論」，其實唔係佢原創嘅，佢只係執反對總辭嘅白鴿黨副主席劉慧卿嘅口水尾。呢兩位立場同背景都咁唔同嘅女士，竟然都會持同一想法，你話五區總辭係咪笑話呢？

詩姐又話就算泛民最後喺五區都力保不失，亦唔代表香港社會都可以全身而退，因為單係安排五區補選，全港納稅人已經要先輸一億五千萬元公帑，仲平白浪費咗大量原本可以用嚟正正經經討論政改嘅時間同精力。

對於有人認為如果五區公投搞得起，可以逼到全國人大常委會修改二○一二年冇普選嘅決定，或最少就往後嘅雙普選交代更清晰嘅路線圖，詩姐強調政改問題中央都有權決定，唔係香港人話點就點，有關想法根本就不切實際，最後只會近嘅（二○一二政改）遠嘅（普選路線圖）都攞唔到，乜都輸清光！