05/01/2010

播放本新聞相關短片

博客擂台:公院護士荒

一個全新的報上部落格,每日與你暢談社會至Hit話題,剖析問題所在。

小白觀點:病人入院自助護理

近年公立醫院前線人員大逃亡,特別係前線護士走得郁嘅都走人,舊年全港公院有七百幾個護士離職,試過因為冇護士而做唔成手術。所以呢,大家最好有定心理準備,以後入醫院要病人自助護理。

由於依家仲未可以搵到一個手腳靈活過阿童木嘅醫療機械人,醫生做手術時要身兼護士一職,病人唔可以再全身麻醉喇,醫生叫你遞鉗就遞鉗,攞刀就攞刀。不過記緊要聽話,唔好同自己條命過唔去呀!由於你冇醫護專業執照可以名正言順醫療失誤,周一嶽唔會同你死撐,死唔去會畀人告無牌行醫o架,若然大吉利是有乜冬瓜豆腐,死因庭會裁定係「死於愚蠢」,簡稱「死蠢」。

網友觀點...X)...

[ Chris Lee ]

唔係啩,自己顧自己,咁我入醫院做咩呀!

[ 何小姐 ]

護士工作都唔易o架,冇番咁上下耐力都做唔到,大逃亡都應該係為勢所逼嘅,又唔見私醫護士罷工?

[ Rita ]

日日超時工作,係人都想死啦,何況護士做到隻積咁,水準一定差,好心公院請多啲人手啦。

[ 晴晴 ]

唔怪得公院咁多失誤,護士個個做到得半條人命,邊仲可以照顧病人吖!

網址:www.sunsiupak.blogspot.com

阿豪觀點:醫局豪自己唔請人

公立醫療系統肥上瘦下係人都知,影響所及,前線醫護人員係咁流失,淨係舊年全港就有七百幾個護士離職。喂,依家豬流感風頭火勢喎,咪即係攞市民條命較飛?

呢頭話護士荒,嗰頭醫管局又爆單勁嘢,原來佢哋總部有個「勞斯萊斯」式豪華設計嘅會議室,咁都算啦,班高層要威嘛,吖,點知原來會議室使用率勁低不特止,仲要全日長開冷氣等啲名貴木材唔好發霉,最終要再使千二萬搞節能設施添!

大拿拿千二萬,都唔知可以請到幾多個護士啦!佢哋或者以為啲前線醫護人員走晒,咪少啲機會出現醫療失誤,咁佢哋就唔使孭鑊嘞。

網友觀點...X)...

[ 齊齊嘆 ]

依家有病都寧願睇私家,睇門診都係二百零蚊,但係服務就好好多,起碼唔使喺公立醫院排餐死先吖。

[ 見鬼2 ]

同意,我試過眼發炎去公立睇急症,竟然要等五個幾鐘!真係火都嚟埋,呢啲係咩服務?

[ 匿名 ]

我都同意睇私家好啲,我試過睇普通門診,唔計藥只係百五蚊,但就唔使點排隊,如果去公立,排到死都未睇得。

[ 刀王之王 ]

私家醫院連啲護士都靚過人,呵呵……

網址:www.lukchiho.blogspot.com

發表方法

讀者如對本欄每日話題有任何意見,歡迎登入網址發表意見。本報保留採用刊登權利,不另作通知,敬請留意。

明日主題

警方盜竊指南