好搞笑？呢段古仔有香港真人版o架，不過只有戇居張三，唔見笨賊王二。嗱，深水埗係爆竊重災區，舊年頭十一個月已經發生近四百單，平均每日起碼一單。為打擊罪案，警方近排除咗加強巡邏外，又喺案發大廈外貼出「警方防罪呼籲」。

望真吓張通告，有啲唔對路噃。除咗案發地址，連被爆竊單位嘅保安漏洞、竊匪犯案手法都一一列出，詳細過案情重組，仲介紹埋「絕招」添：用鈎打開鐵閘、由隔籬天台潛入、用硬物撬開木門，甚至「教」埋點樣用卡片開門添。

叮！提醒居民加強防範意識係好事，使唔使列晒咁多細節，搞到好似「爆格指南」咁呀？正如楓樹街一間服裝店嘅老闆娘話齋，有啲人對犯案手法知啲唔知啲，警方將爆竊詳情寫晒出嚟，直情係教埋人點犯案啦。一句點中要害！

仲有怪雞啲o架，通告甚至將戶主失竊嘅財物，例如現金、首飾、手提電腦同數碼相機等列埋出嚟。嗱，地址有嘞，點落手都教埋，依家又話埋畀賊人聽入面會有乜筍嘢，呢份「皇榜」同張三嘅字條有乜分別？「王二」睇到直頭開心到暈，按圖索驥，一定得米。

講真，當局與其用啲不切實際，甚至會引人犯罪嘅手法宣傳防盜意識，不如加強巡邏同協助居民制訂有效措施好過啦。本報記者去其中一幢曾被爆竊嘅大廈睇過，發現連保安都冇，大門形同虛設，變咗無掩雞籠，任人出入。最基本嘅防盜措施都唔掂，貼張咁嘅通告盞吸引賊人嚟「幫襯」，你話係咪好做唔做吖？

話時話，當局捉錯用神見怪不怪啦。好似搞到香港人心惶惶嘅「鏹水彈」咁，每次出事，警方都話不惜一切嚴肅處理，又懸紅又裝「天眼」，但出事地點附近大廈依然中門大開，狂徒隨時有機可乘。結果一年內發生近十次，「空襲」地點由旺角轉到深水埗，早排仲去到銅鑼灣添，但依家狂徒仲逍遙法外。

鬼咩，當局除咗出事頭幾日大陣仗做吓騷外，最叻就係將懸紅加碼，最近已經由九十萬加到一百二十萬。專家都懷疑鏹水彈狂徒存心挑戰警方，懸紅愈加，變態心理嘅滿足感就愈大，正中下懷，唔怪得狂徒愈來愈肆無忌憚啦。

話時話，避免鏹水彈中招，至多行埋騎樓底，甚至唔入鬧市啫。家陣當局靠害，貼張咁嘅「皇榜」出嚟，唔通叫居民連工都唔返，留喺屋企等賊仔上門咩？叮！