工展會今日煞科，喺呢個月好多人都把握機會入咗唔少貨，就連東區區議會主席丁毓珠都唔例外。唔講唔知，原來珠姐係李錦記嘅忠實粉絲，早前佢行工展會時就大手入咗批李錦記蠔油，自用之餘，仲分咗唔少畀朋友添。
珠姐話雖然自己甚少入廚，但都有幾味拿手嘅家常小菜，而佢最鍾意就係用李錦記嘅蠔油炮製菜心炒牛肉。佢教路話煮餸最緊要係少油、少鹽同埋少糖，仲要即炒即食，咁就食得健康又好味啦！
珠姐唔只識食，仲好識得歎世界，喺啱啱嘅聖誕假同家人去澳洲嘅黃金海岸玩咗四日，享受陽光與海灘，都咪話唔梳乎！
另一邊廂嘅灣仔區議會主席孫啟昌就得個恨字囉。為乜搞到咁可憐？咪就係因為佢個環頭灣仔區都受到鏹水彈襲擊囉，為咗盡快安裝天眼，佢喺聖誕節期間差唔多日日都要去考察安裝天眼嘅位置，有時仲要一日跑兩場添！