好多市民都睇煲呔曾唔順眼，早前有個中學生調查更當佢冇到，立法會「五散人」之一嘅議員林大輝就更加，佢早前已經寸爆煲呔曾亂噏，尋日又再發炮。
應多接觸群眾了解民生
話說前日煲呔曾專登要元朗奶茶王大發餐廳留起兩張枱，方便佢鬼祟出遊兼醫肚，點知到場一見到記者就連車都唔敢落，掉頭原車走人。大輝尋日就話，香港係個開放嘅社會，無論特首定議員都一定要多啲接觸群眾，先可以了解真正嘅民生需要。
大輝又寸煲呔曾話：「做特首唔可以縮埋o架喎！」仲話若果倒轉係佢，一見到記者就掉頭走，實唔使旨意喺政圈撈得掂喎！睇嚟煲呔曾再係咁縮落去，真係可以好快唔使撈！