財爺鬍鬚曾計劃尋日下晝啟程去北京，係威係勢咁連同金管局總裁「攞命陳」陳德霖、財經事務及庫務局局長「傻強」陳家強同中央政府財金官員會面。點知鬍鬚曾撞正北京十三年嚟最早嘅一場大雪，多班往返香港同北京嘅航班被迫取消或延遲，結果佢滯留喺香港國際機場，呆等三個幾鐘頭都登唔到機，一行人最終無奈要打道回府，可謂出師不利。
佢哋要延遲到今朝八點半先有望起飛，但北京天氣仲係咁差，係咪可以成功起飛，真係天曉得，睇怕佢要同自己講句「希望在明天」。
心水清嘅人就會知道，其實佢已經連續第二次上京有阻滯喇！其實鬍鬚曾嘅黑仔指數已經飆升到超出警戒水平，先係舊年九月尾突然心臟病發，被迫缺席北京閱兵儀式，除咗錯失一次上京面試嘅機會外，仲令人質疑佢身體狀況未必適合出任特首。
呢次終於有機會帶埋包括攞命陳在內咁多口靚一齊上京，點知真係「天有不測之風雲」，竟然又撞正北京天氣咁差，都唔知係佢黑仔吖，抑或攞命陳腳頭唔好，真係唔知邊個累邊個呀？