元旦日除咗係新一年嘅開始，亦都係黃友嘉嘅新開始。上任僅三日嘅黃友嘉尋日首次以廠商會會長身份出席工展會嘅活動，但唔知佢係咪初挑大樑未熱好身呢，作為主人家嘅佢致辭時講得好快，又有啲怕醜，好似好緊張咁噃！
廠商會尋日喺工展會搞咗個「十八區齊來唱好二○一○」嘅活動，今次活動為咗壯大聲勢，仲邀請咗十八區嘅區議員嚟撐場。不過聽講呢期班區議員忙到飛起，其實都唔係好想嚟，但為咗畀面都有抽空出席。可能黃友嘉新上任，對處理呢啲社交場合未太熟手啦，眼見佢都冇主動招呼班畀足面出席嘅區議員，要其他人提點先走去同佢哋打招呼。
查實又好難怪佢嘅，佢係學者出身，喺芝加哥大學讀完經濟學博士後，一直都係喺幕後發力，幫廠商會嘅社會經濟委員會做研究，突然間要面對咁大型嘅場合都有一定難度。不過相信以佢嘅聰明才智，會長呢個位實好快上手！