本文重點
「星之子」陳易希發明極具天分,但原來講起「煲冬瓜」就未必咁叻。尋日佢出席一個活動,有幸向中國科學院常務副院長白春禮討教內地科技發展,唔知佢係太緊張抑或係對講普通話冇信心,佢全程以廣東話發問,結果要勞煩另一嘉賓北京大學神經科學研究院于常海教授即場翻譯,好彩都無礙兩代發明家嘅交流。
出年畢業 搵研究工作
陳易希話新一年會繼續研究,打算將中四時嘅發明改良,就係一隻監察長者健康狀況嘅手錶,可免長者失救而死。佢現時就讀科大電子及計算機工程系三年級,出年就畢業,問到將來去向,佢話希望繼續讀上去,但想先出去闖吓,可能會搵有關研究嘅工作。
原來佢唔單止學研兩忙,仲要抽空拍拖,相當口密嘅佢只肯透露女朋友係喺學系內相識嘅,咁忙可以點樣忙裏偷閒?佢話:「惟有當研究係娛樂,秘訣就係『零Hea』,全部時間都要好有效率咁運用。」