有消息話中聯辦有意再次撮合屬於新建制嘅沙田獨立區議員龐愛蘭同富貴黨，結集兩派之力幫田北俊喺新界東撼社民連嘅「長毛」梁國雄，贏咗就梗係可以加大富貴黨喺立法會嘅發聲權啦。而為咗補償龐愛蘭，喺二○一二年嘅立法會選舉，富貴黨就會要愛將「哪吒」方國珊讓路，畀龐愛蘭喺新界東排首位出選。

但傳聞呢個提議引起唔少富貴黨人反彈，哪吒就更加唔肯讓路。最大嘅問題係神女無心，事關接近龐愛蘭嘅消息亦話，佢唔願意接受呢個安排，亦覺得無需等到二○一二年先入立法會，執意今年就要單飛出選。

擔心入黨消耗精力

前排遇到龐愛蘭，佢承認好大機會參加補選，爭在最終五區總辭係咪搞得成。佢明確咁否認加入富貴黨嘅可能，話入黨會好消耗精力，仲指補選完結前都唔會加入任何政黨。

佢總結○八年立會選舉一役，指自己輸在起步太遲，相信當年如果早少少做選舉工程，結果會好唔一樣；所以依家佢已經早有預備，又諗定招數應付泛民嘅告急戰略，睇嚟對新界東席位志在必得。但對於點同其他建制派協調選票，佢就話仲未諗掂，會爭取有相同理念嘅政黨支持。

雖然佢講到好有信心，但事實上新東界呢區仲有好多變數。一嚟富貴黨唔會咁輕易放過呢個黃金翻身機會，點都會派人出選。二嚟建仔喺○八年新界東搶咗十萬票，而龐愛蘭同屬沙田區嘅建仔區議員「EQ」葛珮帆亦諗住食住劉江華個票倉，磨拳擦掌出戰新界東。

喺咁嘅形勢下，龐愛蘭上次選舉只係攞得兩萬幾票，仲少過田北俊嘅票數，假如佢想單飛成功，又唔同建仔講掂數嘅話，咁可能就既同EQ鍊過，又要同長毛打交，睇嚟要爭立法會張櫈仔都好有難度喎！