小白觀點：唔通的士都索K？

二千架的士入完氣行行吓突然離奇死火，連迫力都冇埋，真係牙煙，奇就奇在，油公司話佢哋嘅貨非常靚；而機電署又唔多理，要等到放完紅日假返工至處理。咁又係呀，放假大過天，好多高官都知道香港嘅安全系數認真低，如非必要梗係飛晒去外國度假，要佢哋縮短行程返嚟Check吓啲氣有冇事？冇嘢呀！

弊在聽講話唔止的士有事，依家連小巴都中招，到底真正原因係乜嘢呢？唔通鬼整？唔通司機索K，連架車都索咗K乎？喂，要唔要開個X檔案調查吓呢？如果係咁就要搵個茅山法師返嚟，幫個石油氣缸通吓後庭七七四十九日，話唔定可以驅邪治妖之餘，連鬼卒都少啲呀！

網友觀點...X）...

[　Gordon　]

好牙煙，開開吓車死火，容乜易撞車呀，都係離遠啲好！

[　偉強　]

好離奇，又會遲唔壞早唔壞，要一齊壞，幾千架死火，幾恐怖！

[　小小蘇　]

查起上嚟，個個都話唔關佢事o架啦，如果唔係氣有事，機電署又唔Check，點會死火死成咁吖，死唔認。

[　匿名　]

何止X檔案呀，F檔案都要開啦，連小巴都出事，一定有陰謀！

網址：www.sunsiupak.blogspot.com

阿豪觀點：提早減排用心良苦

的士大佬近日反映，有成二千架車入氣之後突然跪低，架車行吓停吓影響生意唔在講，仲分分鐘發生意外，認真危險。最好笑係，件事原來舊年九月就發生，機電署亦都一早知道，竟然過咗幾個月到家陣大爆發都未搵出原因，有冇搞錯？話時話，機電署遲遲唔肯拆除呢顆「的士炸彈」，可能係用心良苦，要維護本港素來行之有效嘅「大市場、小政府」原則呢？全香港又唔係得一間油公司提供車用石油氣，司機大佬唔啱咪揀到啱囉……

可能大家會問，依家好似唔止一間油公司懷疑出事喎……咁仲好，全港的士小巴摺埋晒佢，提早完成減排目標之餘，話唔定仲可以「餓死油魔」添！

網友觀點...X）...

[　amazing東　]

係咪大陸石油特別易出事……之前都未試過嘅

[　食蕉啦　]

超，啲石油氣係阿爺賣畀我哋，如果真係有事，香港政府都唔敢出聲啦～～

[　匿名　]

如果啲油真係有問題會好大鑊，隨時發生大車禍，唔該中石化畀啲良心做生意，唔好係度整古整怪，到頭嚟啲客走晒！

[　三國鼎立　]

搞成咁，最好暫時唔搭的士啦，行出馬路都最好避開啲的士。

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

公院護士荒