車禍死者喺附近一間中學任教，返學校參加聖誕聯歡會途中飛來橫禍，四口之家失去經濟支柱，同學仔冇咗位好老師，人間悲劇，莫過於此！

現場平時有好多同學行路返學，好彩學校放緊假，唔係後果更加不堪設想。依家係聖誕新年假期，普天同慶，但馬路危機四伏，隨時樂極生悲，市民出街步步驚心，唔知幾時會遇到醉酒佬揸車衝埋嚟，乜嘢Mood都冇晒啦。

警方事後表示，聖誕同新年期間會加強打擊酒後駕駛，總動員做隨機酒精測試，仲話醉駕引致傷亡嘅事故「一宗都嫌多」，又話今年以來涉及酒後駕駛嘅車禍比舊年已經減少七成。

冇人懷疑警方打擊醉駕嘅誠意，之但係，實際情況同市民嘅期待落差好大。話時話，「酒後駕駛，害己害人」呢句口號，電台聽到，電視又睇到，當局喺宣傳方面做咗唔少工夫，但效果認真麻麻，離「一宗都嫌多」相去甚遠。呢嗱，尋日秀茂坪車禍發生前冇幾耐，元朗有私家車撞到的士，肇事司機經酒精測試亦證實超標。

叮！一日兩單懷疑酒後駕駛，好明顯情況依然好嚴重喇。問題點解決？其實一啲都唔複雜，除咗加強宣傳，教育司機端正駕駛態度，警方加強執法之外，想治標又治本，最有效嘅辦法就係加重刑罰，以儆效尤。

呢嗱，今年一月落馬洲發生六死嚴重車禍，肇事司機酒精測試嚴重超標，佢承認六項誤殺罪，但僅被判監六年及吊銷駕駛執照。正如有家屬話齋，六年刑期等同一條人命只判一年，即係話畀公眾知，飲醉酒撞死人亦唔使重判。

警方今年二月初開始執行隨機酒精測試，之後四個月就有四十八人斷正，就算首次有司機冇發生意外但違反酒後駕駛法例被判監禁，但都係緩刑，唔使踎監，更多嘅只係停牌三個月、罰款幾千蚊算數。刑罰輕過痕，醉貓司機仲唔踩油踩到盡咩。

睇吓內地吖，南京有司機醉駕導致五死四傷，早幾日被判終身監禁，死者家屬仲不滿判刑太輕添。根據內地新修訂嘅條例，明年四月一日起，包括酒後駕駛在內三種違法行為，扣分加倍，即係一被發現即刻釘牌！

呢啲咪叫治亂世、用重典囉，如果港府真係有心改善道路安全，杜絕酒後駕駛嘅，快啲北上學吓嘢啦。叮！