今屆工展會喺十日後、即一月四號就閉幕，但民政事務總署喺尋日平安夜無啦啦發咗份新聞稿，告知傳媒工展會設立一個專區推廣社企產品同服務，有十六間由署方「伙伴倡自強」計劃資助成立嘅社企參展，當中包括出晒名嘅「東華三院大角咀麥太」甜品屋，呼籲市民多多支持。

新聞稿原意係好嘅，可惜遲咗十二日發出，事關工展會喺本月十二號已揭幕，至今已係第十四日展出，署長陳甘美華係咪啱啱瞓醒呀？

署方仲自我踢爆，話呢十六間社企係分三個階段展出，各為期六至八日，換句話首兩批社企未能受惠於新聞稿嘅宣傳，即使生意唔好都要焗住交場畀下一批社企參展。

陳甘美華之所以被冠名「騰雞美華」，皆因佢騰雞又怕事，喺今次新聞稿事件，更發現佢仲鍾意發夢，莫非尋日睇到本報報道東華三院旗下社企推銷聖誕曲奇後，忽然如夢初醒？