本文重點
由工聯會會長「棠哥」鄭耀棠拉攏組成、為同泛民抗衡嘅「政制向前走大聯盟」，上個禮拜已公布咗九十六個發起人名單，但當中全部係建制派嘅中堅分子，冇乜驚喜。棠哥尋日再公布第二批名單，四十八人中大部分係港區人大、政協，同樣新鮮感欠奉，但今次請到商界「大孖沙」、身兼政協常委嘅新地非執行董事郭炳湘同樂壇校長譚詠麟充撐場面。
曾被質疑牙力唔夠
上一份名單其實都有藝人萬梓良份，但佢近年幾近息影，所以外界質疑棠哥牙力唔夠，請唔到有分量又有噱頭嘅人物加入，加上大聯盟近日被指廣告誤用區徽，認真出師不利，棠哥可能受到呢啲批評啟發，先諗到搵譚校長出手相助。譚校長其實一向同建制中人啱嘴形，過往每逢政府管治亮紅燈時，佢都會發表撐政府嘅言論，舊年更獲頒「荷蘭水蓋」，依家棠哥吹雞撐政改方案，譚校長加盟都好理所當然。
棠哥話，截至尋日傍晚，大聯盟再收到四十一個團體同四十八位社會人士加盟，但睇番份名單，依然係人大、政協佔大多數，好似有陳婉嫻、張學明、林淑儀、劉宇新、蔡素玉同盧瑞安等。