雖然五區總辭仲未落實，但被傳好大機會代表建制派出戰新界東補選嘅「政壇新星」、沙田區議員「EQ」葛珮帆，早兩日就扮成聖誕老人，喺銅鑼灣推動低碳環保聖誕節，仲派糖畀市民同遊客。EQ一身紅色聖誕裝束外，仲見佢着住對「令立立」嘅Prada長皮靴，細問下原來佢係Prada擁躉。
EQ鍾意趁去外國旅行掃減價名牌貨，一嚟比正價平，二嚟款式同香港唔同，着出街好少會同人撞款，唔使咁尷尬。EQ話對Prada長皮靴係早前去外國旅行期間購買，減價後相當抵，但就唔記得咗價錢。
Prada啲皮鞋一對由幾千蚊至過萬不等，長皮靴估計起碼要七千至八千蚊，睇怕減咗價都唔平得去邊啦！
