前幾日先講過有六個問責司局長趁聖誕放假叉電，雖然有啲已經銷假返工，但政務司司長唐唐、民政事務局局長曾德成、食物及衞生局局長周一鑊同保安局局長李少光，仍然歎緊世界未返工。本身大家以為呢批局長放完假後，政府應該維持正常運作，點知一睇尋日出版嘅憲報，先知政府依然會停留喺半真空狀態，事關又多四個局長申請放假。
接力放假嘅局長包括環境局局長邱騰華，佢由本月二十七號一路放到下個月六號，一口氣放十日假，睇嚟可以趁機逃離畀慳電膽風波困擾，順便檢討吓。財經事務及庫務局局長陳家強、商務及經濟發展局局長劉吳惠蘭，同埋喺政改諮詢孭重飛嘅政制及內地事務局局長林瑞麟都會放假去歎世界。
聖誕新年假期間，三司十二局保持住四至六個司局長攞咗假，大家真係要趁聖誕節祈禱千祈唔好發生大事，否則政府一定倒瀉籮蟹！