財委會喺本月四號開會審批職系架構檢討同多元化社區活動兩項撥款建議，政府最初以為議員只會集中關注前者，後者應可無風無浪順利通過，只派出許曉暉同一名民政事務總署副署長出席會議。點知結果啱啱相反，多名泛民主派同個別建制派議員輪流發炮，批評有關撥款缺乏監管，勢必淪為建制派政黨亂搞派糖活動變相買票嘅工具，最終將撥款文件押後表決。

以為掘到票 累慘建制派

據聞民政局事後大表冤屈，質疑白鴿黨嘅民政事務副發言人黃成智，話佢曾經應承過會支持撥款，最後卻臨陣轉軚反對。換言之，即係話民政局走去掘白鴿黨嘅票，點知被蹺起，反而畀掘出嚟嘅沙泥堆埋自己。

黃成智澄清話佢的確同許曉暉講過個人支持撥款，但亦有講明該黨最後投乜嘢票始終有待黨團開會決定，最後黨團拒絕接納佢嘅意見，佢都冇辦法㗎，加上表決當日佢咁啱去咗台灣訪問，想幫拖都冇機會，否認有心跣許曉暉一鑊。

有關撥款原定只係押後到上禮拜五表決，點知又撞正高鐵撥款泛民大玩拉布戰，就算財委會決定喺下月八號加會，都分分鐘會玩到一月中先通過到；加上筆錢落到去十八區區議會之後，仲要經過一輪程序先批到畀啲地區團體，打亂晒佢哋借舉辦社區活動助選拉票嘅大計，建制派當然非常心急。

有人認為許曉暉缺乏政治經驗，又質疑佢事前冇做足工夫，所以希望佢認真再數多一次票，同埋臨場對應得好啲，唔好畀泛民大到堅持立即表決，就唔會搞到佢哋見財化水嘞。